Surfside Science ta inicia cu team local y sosten financiero di RESEMBID
Oranjestad, 16 augustus, 2022 – Bou proyecto Surfside Science un team di profesional y studiante local lo test y desaroya metodo pa monitor medio ambiente di nos costa pa un aña largo na Surfside Bay. E instrumentonan lo midi calidad di aire y awa di lama, dinamica di costa y vegetación bou awa.
RESEMBID ta un programa cu ta sostene desaroyo humano sostenibel di paisnan y teritorio Europeo den Caribe (OCTs), di cual Aruba ta parti. RESEMBID ta financia dor di Union Europeo y su partner di implementación ta Expertise France. E ultimo ta un agencia di colaboracion pa desaroyo di Gobierno Francés.
Surfside Science kier contribui na resiliencia di Aruba su ecosistema marino y di costa contra e impactonan di cambio di clima. Aruba, mescos cu hopi otro isla chikito den desaroyo, no tin dato di referencia, ni midimento continuo di diferente indicator ambiental. Na fin di e proyecto, Surfside Science ta spera di tin 10 sensor instala na Surfside Bay. E data colecta lo bay di biaha riba e website science.brenchies.com pa uso publico y por benificia specialmente personanan local cu ta activo den area academico, fundacionan, studiante y profesional.
E team diverso di hoben profesional y studiante local cu ta trahando hunto riba e proyecto aki ta:
- Christie Mettes cu tin maestria den ciencia di medio ambiente ta e directora di e proyecto.
- Anthony Sevold cu a studia sciencia di medio ambiente, matematica y fysica y ta traha den microbiologia, ta dirigi e investigation scientifico
- Suyin Ridderstaat cu a studia comunicación, mercadeo y ilustración ta e coordinadora di media
- Raydeline Wever cu ta un studiante di SISSTEM na Universidad di Aruba. Hunto nan lo studia cambio di nos costa cu imagen di satelite
- Manuel Rojas cu ta un studiante di Technische Universiteit Eindhoven di ingenieria eléctrico ta trahando riba calidad di awa
- Alexandra Ulacio cu ta un studiante di SISSTEM na Universidad di Aruba
- Sean Brokke cu ta un studiante di ICT na Fontys ta trahando riba calidad di aire
- Ian Canninga cu ta un studiante di Ciencia y Tecnologia na EPI
- Jeremy Granadillo cu a studia Media y Tecnologia na Rotterdam y ta trahando riba e ‘interface’ digital cu lo ricibi y analysa dato
- Amaryllis Lee cu ta un studiante di Hogeschool Utrecht di Inteligencia Artificial
- Tatiana Becker cu a studia ingeniería, medio ambiental y ecología marino lo compara e metodonan desaroya durante e proyecto cu metodonan standarisa y scientifico
- ScubbleBubbles cu ta un grupo di hoben cu ta ‘dive’ lo yuda verifica e imagenan di satelite
- Cornerstone Economics lo explora opcionnan financiero pa sigui sostene e trabaonan menciona
E proyecto a ricibi appoyo di DEACI y DNM pa por applica pa e fondo y ta collaborando cu Universidad di Aruba y DNM den e desaroyo di e proyecto.
Riba e website aki por mira caba algun sensor prototipo cu a wordo desaroya anteriormente cu sosten financiero di UNESCO y aki tambe comunidad por spera mas información di proyecto Surfside Science pareu cu e sigui avanza. Tambe por sigui riba instagram brenchies of email science@brenchies.com pa participa of haci pregunta. Brenchie’s lab ta un makerspace di Metabolic Foundation. Pa mas informacion di fondo di Union Europeo RESEMBID bishita www.resembid.org
Metabolic Foundation, Flemmingstraat 26, Oranjestad
Pa mas information por contact Suyin Ridderstaat, Communications Surfside Science, suyin@metabolic.nl