Den zomer nos a logra traha e prome prototiponan pa Surfside Science.
Tempo a bula y september a yega, awo scol a cuminsa bek y nos zomer programa a conclui. Hopi danki na e team di studiante cu a traha cu nos den nan vakantie: Manuel (TUe), Sean (Fontys) y Amaryllis (HU), Alexandra (UA), Raydeline (UA) y Ian (EPI)!
Sensors
Den e periodo aki e emphasis a wordo poni pa traha e prome modelo di sistema di sensor pa midi calidad di aire y awa di lama.
Por mira e detayenan di sistemanan cu a wordo desaroya riba Github. Esaki ta inclui e code como tambe diagrama technico, grafico y hasta cnc models pa traha circuit boards. Manuel y Sean tabata hopi ambicioso y a diseña y traha nan mesun PCB riba e Nomad desktop CNC mill.
![](https://science.brenchies.com/wp-content/uploads/2022/11/Air-Quality-Sensor-Wiring-Fritzing_bbfinal-1024x779.jpg)
Field test
E prome version di e sensor pa midi calidad di aire a wordo instala na Neptali Henriquez park, unda nos a haña cooperacion di meneer Ben King. Na prome instante tabata tin algun problema pa mantene e sensor online pero despues di un tiki debugging awo e la logra keda cendi y activo pa varios siman caba.
E prome version di e sensor pa midi calidad di awa (riba nos header) di lama a wordo instala na Surfside Marina cu cooperacion di meneer Richard Eman.
Cu nos prome prototipo na Waf’i Rancho nos a ripara cu alga a cuminsa crece riba e sensor hopi lihe. Pa evita e problema aki, Alexandra a bin cu e solucion di usa waya di copro. Esaki a mustra di ta basta efectivo.
![](https://science.brenchies.com/wp-content/uploads/2022/11/DSC_00281-1024x683.jpg)
Data
E data cu nos ta coleccionando no a wordo valida ainda pero nos a cuminsa wak si nan ta mustra mas o menos correcto comparando loke nos ta midi cu data den region. Cu esaki nos a ripara cu tabata tin varios problema cu e calibramento di e sensor di acido (pH) na lama. E ta parce cu e sensor cu nos tabata usando ta daña. Nos a saca e buoy for di awa pa switch e sensor cu e esun di conductividad, y ta wardando pa un sensor nobo di pH yega.
E otro sensornan ta mustra di ta trahando bon. Pa awo nos a cambia e sensor di pH pa esun di conductivdidad paso nos tabata tin un isolator so y dor di esaki mester a kies entre nan dos. October piesanan nobo lo yega pa drecha e sensor.
Database
Jeremy e software engineer no por keda atras y a prepara logra traha e prome version di e live database, aki por download data cu nos colecionando den forma di un csv file.
https://surfside-db.brenchies.com/
Pa conclui nos a diseña y test e sensor pa calidad di aire y awa di lama pa traha cu energia solar y carchi gsm. Nos a test cu nan ta waterproof pafo y ta communica constantemente. Nos a mira ki valornan ta midi y haci adhusto unda necesario. Nos a usa a diseño aki pa order piesa cu nos ta spera lo yega na October pa asina implementa un version 2 di e sistema y cuminsa e proceso di validation.
Mapa
E proyecto pa crea mapa di e suelo di lama tambe a cuminsa. Nos a haña hopi appoyo di e comunidad di Universidad di Aruba. Unda Diego a fia nos paddle boards, Francielle a pone nos den contacto cu Shanon pa fia nos kayak, Tobia a laga nos cu un kayak tanten cu e la bai Belgica y Tatiana a logra fia tres windsurfboards. Ademans Ian, Tatiana, Francielle y Suyin tur a fia nos camara GoPro. Asina nos ta wak cu union ta haci forsa. Despues di e prome testnan unda nos a logra haci un proof of concept cu ta mustra cu nos a logra colecciona imagen y GPS usando un GoPro bou awa y un cellular den e kayak diabierna pasa dia 9 di september pa prome biaha nos a bai cu un grupo grandi pa mapa Surfside.
![](https://science.brenchies.com/wp-content/uploads/2022/11/IMG_8042-1024x768.jpg)
Amaryllis y Jeremy a logra traha y test e prome version di e algoritmo pa classifica imagen y hinca esaki den un programa interactivo riba Zooniverse unda nos ta pidi tur hende pa participa pa sortia image y asina train e algoritmo pa reconoce diferente elemento.
Participa
Tin hopi forma pa participa den e dianan ki:
- Yuda nos clasifica e imagenan cu nos a logra colecciona na Surfside: Aruba Seafloor Mapping > Zooniverse
- Ban kayak cu nos pa colecciona imagen di suelo di lama. Diabierna dia 16, 23 y 30 di september nos lo ta na Surfside Beach di 3or pa 6or di atardi, bandi e aeropuerto. Confirma cu nos via whatsapp na +2977447829 of via email na science@brenchies.com
- Duna nos conseho. Na e momento aki nos ta explorando metodo pa integra e GPS location na e imagenan cu ta colecciona cu kayak. Nos ta considerando ExifTool y Geosetter. Bo a yega di usa e programa aki of tin otro idea con pa logra esaki? Manda nos tips :)
Ki Tin pa October?
Nos ta spera cu e material lo tey na October pa nos por traha e di dos version di e sensornan pa calidad di aire y lama y lo ta tragando cu ACE y DNM pa compara lo ke nos ta midi cu otro sensornan comercial y usa esaki pa mehora nos sensors.
Topa na Surfside!